الشاعر الاحوازي الشیخ ابراهیم الدیراوی

شیخ ابراهیم الدیراویمدونة الى من يحب الفلاحية– من شعراء عبادان بدء حياته في جوار العلماء مع ما كان يعاني من ضعف البصر في صغر سنه تعلم مقدمات العلوم الدينية و بعد ذلك هاجر الى مدينة قم و سكنها حتى يكمل مشواره العلمي و رافق ادباء منطقة عبادان و تعلم منهم اصول الادب و فنونه حتى ملك ناصية الشعر في مبكّر عمره و صار شاعرا يستلذ السامع من نظمه و يطرب، نصوصه فی بالغ الکمال من حیث الاتقان و الابداع و الصنعة ينسج القوافي نسيجا جميلا حيث تربط في بعضها ربطا مبدعا فنيا: ولکم هذه الباقه القصائد و شکراً :

قصیده لالا یمه للشاعر

لا لا يمـّه 
لا لا يمـّه اوداعة خالي اوداعة خوتـّــــــــــكم ما ارجع

اوداعة جدنه و صندوق الشاي و نجمات البيهه امرصّع

اوداعة سحـّارة جدّتنه و تربتها و محبـــــــــسها اليلمع

اوداعة تفگة عودي السمَره الماخانته ابـــــشدّه ومفزع

اوداعة قطرات المن صدرچ غذ ّتني الغيره ابيوم ارضع

اوداعة عودي وبشته البدري والمهره المنّ الرّيح اسرع

اوداعة  گعدات امضايفنه اوكل خيّر بيــــــــــــــــهن يترّبع

اوداعة هاونّه او يزلاته اليطرب ليهن كـــــــــــلمن يسمع

اوداعة صوباط الديوان اوحِبنه اليتناغه اويـــــــه المرفع

اوداعة چف الشال المگوارابساعتـــها اوهَد اعلي المدفع

ازحف للموت اعلي اركبّي ولو جسمي اعلي الحگ يتقطـّع

ما گولن آخ امن اصوابي او عيب اترف اعيـــوني و تدمع

عندي النار احلي من الجنـّه بس لا دنّــــــــــج بس لا اركع

ما ريدن جنتك رضوان وماريدن واحــــــــــــــــــد يتشفـّع

للنار ادخل رافع راسي و تكارب وي مالــــــــــــك و طلع

 ********

قصیدة يــــاهظيمه

يــــاهظيمه العمر ذوبـــــل و الامـــل لفتّه غيمه

او ماتن الچلمات يسمر و الگلب حاير ابضيمه

ويا هظيمه ويا هظيمه

***

يا هظيمه اتبيعني بحفنة ارمـــــاد و آنه ليــره

ابتهَر لمن شافني الصايغ اوضل واگع ابحيره

ذهب ما بيه دغش صافي او تضيعني العشيره

لاكــــن ابيضّت ادمـــوم الوادم او ماتت الغيره

و الگلوب اسودّت و حتى النهار اسود ضميره

يمن سوده ابوجه العريضي الحــفر لينه حفيره

من عسه الفركنه وجعت موت و بساعه گصیره

هنا يمن چتفت روحـــي برمشك الظـــالم يسيره

وك اوحات ابوفاضل حرام انچان حبك ردنه غيره

اتكرها عـــافيته اليكرهك كـــون ويطيح ابشهيره

يلعفتني و لا گـــلت محــبوبي المظلـوم اجـــيره

وانه خويه الحزن تابعني ولزگ چبنه اعلى جيره

ابنعش صدري گلیبي ميت لا تشب نـارابسريره

لفني دولاب الهمــوم الظــــالم او ذبـــني ابهيمه

اوفوگ ضيم العلي ضيمك هم اخذ من عندي ديمه

وياهظيمه وياهظيمه 

يا هظيمه الحيل گوض چلقطار اليمر سارع

يمشي و ابسكة الضيم او لا ربيع اولا مرابع

والدريــول ياحبيبي الفلك ليش الفلك گـــاطع

يعت بيه و امري للله امسيت لامر الفلك طايع

وانه ارد وحدي اسنين العمر واشبگهن ووادع

مصارع اويلضيم گضیته العمر واليمته اصارع

هـــا زرعت اعيوني اربيه اوعلى دربك تباوع

هـــا انوح اعله الشباب الصار مثل الثلج مايع

لكن اشبيدي الامـــل محبس فهن منه الاصابع

و الـوكت فجّر العيني اعــيون تتفايض مدامع

جرف يا خذني او جرف يدفعني و امحيّر شدافع

امل گلبي او سعدي اسنين العمر راحن حريمه

او گیلت تنور ضيمي وچیمت اضلوعي چیمه

وياهظيمه وياهظيمه

اليمته اضل ارسم خيالك وانتظريهواي ترجع

اليمته اضل مشتول بشفافي العطش و العين تدمع

شنهو ذنبي ما اشم طيبك و لاهم بسمك اسمع

لاولا نسمه التهب من ديــرتك و العين تهجع

انته ما چنک هــذاك اغزيّل البحشاي يــرتع

يلعشت بلروح يلحبك ربــّا وبضلوعي تريع

يلبتت چلمة اعله بــالي وشافهه گلیبي وتولع

ماهي فصليه يولفي الروح شنهي تريد تصنع

لاولك لا تــذبح اگلیبي طفــل معصوم يرضع

لاولك والعمر كــاغد بس يجيسه الماي ینگع

وانه يم عين الشمس تاخذني الحسبات واوگع

يم بنات النعش و استرجي الگمر يا صوب يطلع

مثل ما بـــدر الامــل هليله عألعــالم تشعشع

ابوالـــزهره العله العالم فجّر الثوره العظيمه

اوفرحت المخلوگ بس انه الوكت ذبني بظليمه

وياهظيمه وياهظيمه

*******

« مـــر یفــلان »

 عینی السمه و جفنـی الغیم و دمـــوعــــی المــــطر یفــــلان

و شفافی الشــــــته الگـــــیض ، گلــبی و عایش إبحرمـــان

مر یفلان . . .مر یفلان

مر یفلان سالوفة حبایب علی شفاف اللیل

یا مرود کحل إمسیر عله إعیون الفریج إبمیل

و شوف إمکارب إعیونی إویه دمعی إلی عله إخدودی إیسیل

مر یا عطش ، مر یا مای ، مر یا عسل ، مر یا هیل

مر گلبی المحطه إهوای الک و ضلوعی سچة  ریل

إوگف بالمحطه اشوای عود و من ترید إتشیل

صیح وفزز إجروحی و دوس إعله المفاصل حیل

یفی الما کسر فیک ، خایف إعله غیـــــــــری إتمیل

ولک یل عایش إبروحی ، تجی لو جیک إصیح إدخیل

وشیل العتب بعیونی و دمعی إیضل یوازی السیل

و إطش الچلم یم بابک ، بواچی إتشیل  الجیران

مـــر لا تخلینی إحچــــایة إبوسط کــل دیــوان

مریفلان . . . مریفلان

********

وایضاً له :

يمه لا تبچين مو وكت البواچي

يمه هاي الزلم عيب اتهاب

بس الچعبه لاچي

یمه دمعچ لا یشوفونه الیکرهون

ونصیر احچایه لیهم

یمه گـّوه اتجلـّدی جدامهم

وبگلب صابر جابلیهم

یمه لو شافوچ مکسورت الواهس

یفرحون انه ادری بیهم

یمه انه ادری ابمصیبتنه الچبیره

امن اکبر من مصیبتنه حچیهم

یمه هم تدرین هذوله ویــّانه الیاسبب

شدّو عداوه؟!

ماتملگنالهم یمـّه

ولا هبـّطنه لیهم روسنه وادّینه خاوه

یمه عیب العنده غیره اویه الـّذی

مسلوبه من عنده یتخاوه

یمه کل گطره التهل من عینچ

ابگلب العدو تنشتل فرحه

یمه و الظالم اشماراد یتحفّظ

الوکت متکفـّل ابفضحه

یمه لیل الظلم ماهو اطویل لابد ینتجی

ویلوح صبحه

یمه من یهلی عرفت العار والذل و الهضیمه

و ارفضتهن

واطلعت انشد وادور الفخر و العز و العزیمه

یمه یا ماسحگ جدمی الحافی شوک الوکت

واتدمـّه ابصریمه

یمه مایرجع اشمالاگ ابطریجه الاح

یتطلـّب الشیمه

یمه من اجدادنه احنه اتعلـّمینه

اشلون نثبت بلشداید

عرب احنه و ذوله اهلنه

ولیهم التاریخ شاهد

والحمیه المن ثدایاها رضعنه

اتدور من اتشوف واحد اجنبی یوخـّرنه

واعلینه یتجدّم و یتحکـّم

یمه لسّاعه بعده الغیره

ماعافت شرایین العرب

منخلطه بلدم

یمه ماینزل من الحنیور

طعم الذل

وحگ عیناچ علگم

یمه ذوله احنه افاعی

ومن یهیج الزعل بینه

انسوی کل الکون اظلم

نسلب امن عیون اعادینه لذیذ النوم

السمو نشرّبهم

************

قصیدة یخضیر ابو منصور

یخضیر تحنـّـت گاعنا بدمک یبو منصور

دمک دم نبی لو دم أمام الهسا بعده یفور

یخضیر یبومنصور

مر الگیض یخضیر و الف ضربة هوا مـرت

إجتنا تیبـّس دمومک ، تالی إبدمک حمرت

و اجا فصل إصفری و کل الشجر یخضیر صفرت

بس شجرة المن دمک تروّت زهت و اخضرّت

و غسالة یواخین الفلح بصریفتی ضرّت

سکتت ما گول یخضیـّر علیّ صریفتی خرّت

اخاف صریفتی من احچی تغدی سالوفه بین الدور

دمک دم نبی لو دم امام الهسا بعده یفور

یخضیر یبو منصور

و شال صفری چوالاته و اجا خلافه الشتا محزّم

إبحافات المطر و غیوم یخضّیر یگطرن سم

و بعدهی الگاع یخضیّر منها تفوح ریحة دم

و بعده صوابک یهوّس ما غمض ولا سلهم

بعده یدور صوابک یخضیّر علی المرهم

بعده یصیح ما أسمع دوی وعطاب ما أشتم

عرس لو موت یخضیر وریحة مسچ لو کافور

دمک دم نبی لو دم امام الهسّا بعده یفور

یخضیر یبو منصور

یخضیّر و حافات المطر ما غسلن دمومک

یخضّیرعلی الدیره و شجرها انطبعن إرسومک

نجم سهیل یخضّر کلـف ما ینحمل یومک

یرق و مرصّع إبفضه و ذهب ما نگدر انسومک

بعدک عدل یخضّیر ابد ما ماتن عزومک

یخضیر چنت حاصود کلفه وللسّلف ناطور

دمک دم نبی لو دم إمام الهسا بعده یفور

یخضّیر یبو منصور

یخضیر چنت عین الگلاده و مرتعش لمّاع

لمّن تسمع النخوه چنت اوّل نفــر فـــزاع

و انت الچنت یخضیّر إبمسحاتک تهبر الگاع

وحگ غیرة الهزتک یخضیّر وراک سباع

مانسکت عن اخذ الثار ذمک مایروح ضیاع

یا سالوفة الدیوان یا بیــرق شرف منشور

دمّک دم نبـی لو دم إمام الهسا بعده یفــور

یخضیّر یبو منصور

یخضیّـر علی الرشاش اسمک صار حبـّـایه

علی إزنادها حچایاتک یناغن الــرمّــایه

یخضیّـر چفوف الثــّار تومیلک محنـّایة

یبو منصور ما نسکت و دمّک طرّز الرّایه

و نهرنا الصافی یخضیّر بدمک منخبط مایه

حتی النخل یخضیّر بعد ماینکسر فیــایه

یا منجل ذبح  شیّال موزر و انحدر للهور

دمک دم نبی لو دم امام الهسه بعده یفـور

یخضیّر یبو منصور

یخضیّر و حگ عیناک ما تبچی علیک العین

ما ینبچی علی الیمشی بدرب الشرف درب حسین

شهید انت بذلت روحک یبو منصور لجل الدین

و کل گطره الجرت من دمک الطاهر تظل سنین

فشگه بگلب عدوانک و صرخه إتوعی الغافین

یبو منصور ماننساک صدگ و الحمیّـه إتثور

دمّک دم نبی لو دم إمام الهسه بعده یفور

یخضیر یبو منصور

******

قصیدة مربیه

مُر بيه و اخذ من الدمع ،حنة مهر لچفوفك

مُربيه و سحگ مهجتي، بس كون عيني اتشوفك

هاك اخذ ابتوت الگلب، خلهن مشط لزلوفك

دثرني بوجاقك جمر، بلشته يدفي اضيوفك

چتفني اذبيحت نذر، وذبني ابوسط مشحوفك

خليني امهفة نبت ،ترفرف تضل يم طوفك

ولعب ابحالي اشماردت ،يا عيني ابد ماعوفك

ماخاف من ربي ابكثر

ترجف اعضائي ولك من خوفك

مربيه يا چلمة هله ،اتفزز العين القافية

مربيه يا حفنت ضوه ،اتوعي شموعي الطافية

مربيه مو گلبي انكسر، مثل الامراية الصافية

مربيه طش اعلى الجرح ،چلمات حلوه و دافية

وشوف الاهموم اتلملمت ،شي رايحه و شي لافية

وحات الاگلوب البلحزن و حات الجدام الحافية

لو ظل مكان ابهلگلب لسيوفك المتهافية

صدقني چا عيب اشتكي، اهمومي و اگلك كافية

حتی بمحبتک لو متت ،گلي ولك بلعافية

حتی بمحبتک لو متت ،گلي ولك بلعافي

******

وایضاً

یاقطار إلتطوی بسنین العمرلاوین رایح

ماوصلت آخرالسچّه إشمالک إبمشیک تشاوح

وین رایح وین رایح

یاقطارإبسچتک عمری إبراض إسحگ علیها

إبهیده لاتسرع ولک وسنینی اتوانه إبطویها

إضلوعی من تِرگُل فراگینک بعدیکثرحینها

ولوصحت یضّن إعظامی وحسرتی إتوجّ إبدویها

یاقطارإهوایه إلمحطات یاهی إلتحط بیها

إشچم محطّه إمرگت وإنته إمرگت مسرع علیها

وروحی طیر امکسّرإلجنحان وتفرفش شبیها

حگهالوفرفشت روحی إمد ویرهِ وماهی سفیها

دیرتی إلعشیت إبمرابع ها وتربیت إعلدیها

إشلون أعوفنها وتضل یاهوإلیرد إلصوت لیها

إعونت إصبیّح وحلّت عینها إبعزها و ولیها

مثل عین إلرّمده بارتِلی وجفنها إعلیّه شابح

بس حِلیت إبعینها إتعدنی وتخلّیها نوایح

وین رایح وین رایح

یاقطارإتوانه لاتسحگ أمل روحی وحِلمها

کِسّریت إمرایت آمالی وبعد گِلّی إشیلمها

وبَهذَلِت مکسورة إلخاطر إلمحتاره إبولمها

أمّی إلتستریه من اکبرتِذِب کارت هظمها

یاقطارإترید أسولفلک سِوالفها وشیمها

إشچانت إتگلّی من أصیرإحذالهاولوجیت یمها

إتگلّی اُمّک شافت إلهَم هیچی هم إتزیج همها

هیچی هم تکبر وترفع راسها وتِدگرخصمها

وچانت إتهوسلی هوسات الذی إتهزنی ابعزمها

هوسة إلثاروتگلّی السّبع عفیه إبنی ختمها

وکبرت وستگوت إعظامی اسّگتها إبذهب دمها

اوگمت أشد إحزام ویّه الزّلم لوشدّت حزمها

وامّی ذیچ إصبحت اُم إفلان لوجابو إسمها

زهت بیّه انوارها وأصبح ربیع إلگبل بارح

وآنه موذاک إلیتیم إللومشه یثجّب الصایح

وین رایح وین رایح

یاقطار إلبهذلت ایّامنه وذیچ اللیالی

وگطعت حبل اللضمنه آمال بیه مثل اللآلی

وطشّرتهن مثل دمع إعیونه إلکلوکته هالی

یارُخص دمع إلیتیم ودمعت إلماعدها والی

ورحت ماچنّک سمعت امّی تصیح إبصوت عالی

ولک ریّض خل أشوف إبنی البجیّه ومابگالی

إبنی وماعندی غیره إعوینتی وفرگاه غالی

وإنته یلماکسر گلبک حالها ولاظیم حالی

او عوّدت للبیت تتوچه إبضلع مکسورتالی

إتدوّرإبیت إلأمل والبیت من الأمل خالی

إتصیح راح إبنی وعگب عینه إلهظُم والذّل لفالی

إبنی إلرّدته یضل یَمّی سّوادَه ومایبارح

شردأجاوبها إلتناشدنی إلیماسیچ ویصابح

وین رایح وین رایح

یاقطارإتهُوی روحی إبظیمهاوزایدحزنها

إعله إسّلف وتنوح مثل إلوالده المذبوح إبنها

بِلِگماط إنگطع راسه إلیکرهچ وهوه إبحظنها

إیه یادیرتنا یلماعینی شبعت شوف منها

إیه یانخلاتی یلماحسّبت أبتعدعنها

إیه یادیرتنا یلطبها إلعدو إبغفله وسکنها

اولملم إحچایاتنه إلحلوات بِشکاله ودفنها

یَمِن عونه إلغفه عینه إبدیرته ویطبگ جفنها

ومن إیفزیسمع طیور إلشجرتتغاوه إبلجنها

اُفیش یاریحة إتراب إلسّلف ریحة مِسچ چَنها

اُفیش یانسمه إلسیرإلفجرعَلورده إبقصنها

اُفیش یاذیچ إلسواجی إلبیهافَی السّعف لایح

إشیبّس إشفایفها چاذاک إلزّلال إلبیها طافح

وین رایح وین رایح

*********

تشرفنا بزيارتكم ونتمنى دائما أن ننول رضاكم.

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s